Skýrsla Hafró - það er eitthvað skakkt við þetta !

Hafró birti skýrslu sína í gær um nytjastofna og aflahorfur og ekki er útlitið bjart, maður lifandi!  Nú er lagt til að ekki verði veitt meira en 130 þúsund tonn af þorski, takk fyrir.  Hvernig má það vera að því minna sem úthlutað er af þorskveiðiheimildum því lakari verður stofninn.     130 þúsund tonn!  Það var verið að veiða 360 þúsund tonn ár eftir ár á árunum 1975 til 1980 og stofninn stækkaði og stækkaði. Er ekki eitthvað skakkt við þetta?  Átti kvótakerfið ekki að styrkja sjávarbyggðir og vernda stofninn.  Nú hefur þetta snúist upp í andhverfu sína. 

Í stjórnarsáttmála nýrrar ríkisstjórnar undir kaflanum kraftmikið atvinnulíf kemur fram að “Gerð verði sérstök athugun á reynslunni af aflamarkskerfinu við stjórn fiskveiða og áhrifum þess á þróun byggða.” Varla er þetta ákvæði sett þarna inn nema það eigi að gera eitthvað við niðurstöðuna.   Íslenska þjóðin á því heimtingu á að þessi athugun verði gerð tafarlaust af óháðum aðilum.  Hvorki Hafró eða sjávarútvegsráðuneytið ættu að hafa puttana í þeirri vinnu. Enga ríkisvísindamenn! 

Já, talandi um ríkisvísindamenn, var ekki gullkarl hér fyrir vestan að tala um það fyrir nokkrum árum að Hafró væri meinvarp á þjóðinni og  ætti því betur heima undir háskóla en ráðuneyti?  Jú, það er eitthvað skakkt við þetta!

 

Til hamingu með Velferðarstjórnina

 

Nú hafa Íslendingar fegið nýja ríkisstjórn sem þegar hefur fengið nafnið Velferðarstjórn.  Okkur tókst ekki að fella ríkisstjórnina né að koma báðum stjórnarflokkunum úr stjórnarráðinu en Samfylkingin er samt mætt til leiks með vel útfærð stefnumál sem hafa verið unnin af fjölda manns undanfarin ár.  Samfylkingin lagði upp með áherslur  á velferðarmálin í kosningabaráttunni og þau mál fá mikið vægi í stjórnarsáttmála nýrrar ríkisstjórnar.  Tími Jóhönnu Sigurðardóttur er kominn, hún er mætt á ný í Félagsmálaráðuneytið sem nú hefur fengið nafnið Velferðarráðuneyti.  Ég er mjög ánægð með ráðherraval Samfylkingarinnar í velferðarstjórninni skipað jöfnum fjölda karla og kvenna en ég segi ekki orð um val á ráðherrum Sjálfstæðisflokksins, EKKI ORР Læt konurnar í Sjálfstæðisflokknum um það.  Nú getur ríkisstjórnin hafist handa við að færa íslenska velferðarkerfið aftur í átt til hins skandinavíska módels frá því módeli sem fráfarandi ríkisstjórn setti það inn í og er kennt við það ameríska.

Það sem Samfylkingin hefur fegnið samþykkt að setja inn í hinn nýja stjórnarsáttmála er aukinn jöfnuður með áherslu á yngstu og elstu kynslóðir þessa lands auk þess að bæta kjör þeirra sem standa höllum fæti.  Einnig á að bæta kjör barnafjölskyldna s.s. lengja fæðingarorlof, hækka barnabætur, bæta tannvernd barna með gjaldfrjálsu eftirliti, styðja nemendur framhaldsskóla í kaupum á námsgögnum, auka stuðning við langveik börn, börn með hegðunarvandamál, geðraskanir og þroskafrávik.

Þessi velferðarstjórn hefur einnig sett inn í sáttmalann áform um að lækka skatta á þá lægst launuðu.  Það er aldeilis tími til kominn því hinir sem hæstu launin hafa fengu sín kjör bætt hjá fráfarandi ríkisstjórn.  Húrra fyrri þessu og öllu hinu sem við getum búist við að Velferðarstjórnin vinni að á komandi kjörtímabili.

Hvað kom svona á óvart með Flateyri?

Furðulegt að heyra þingmenn og ráðherra hér fyrir vestan tala um að sala á aflaheimildum á Flateyri hafi komið þeim á óvart.  Þetta er einmitt það sem hangir yfir höfðinu á íbúum í hverju einasta sjávarútvegsplássi á Íslandi.  Þetta er líka alltaf að gerast, aftur og aftur, á hverju einasta ári.  Samt kemur þetta þeim gjörsamlega í opna skjöldu.  Í hvaða heimi lifa þessir menn?  Svo koma þeir fram í fjölmiðlum og segja að þetta sé allt saman háum vöxtum og háu gengi um að kenna.  Auðvitað getur það verið einn partur af vandanum, en hverjir sköpuðu þetta umhverfi í efnahagsmálum?  Það var ekki náttúruafl, það var gert með handafli.  Hverjir hafa sett á kvótakerfið og staðið vörð um það?  Það er heldur ekki náttúruafl það er líka gert með handafli.  Nú segja sömu menn og beittu þessu handafli að sala á aflaheimildum komi þeim gersamlega á óvart.  Nú tala þeir enn einu sinni um sértækar aðgerðir í byggðamálum, ekki heildarlausnir í byggðastefnu á Íslandi.  Þessu þarf að breyta,,, með handafli,,, því þetta er ekki náttúrulögmál. 

Kom Björn illa fram við Jóhannes í Bónus?

 

Sjálfstæðismenn kunna Hannesi  Hólmsteini litlar þakkir fyrir að gaspra um það í hádegisviðtali hjá Þóru Kristínu á stöð tvö að Björn Bjarnason dómsmálaráðherra  hafi komið illa fram við Jóhannes í Bónus því það er nú meira en margir hafa þorað að viðurkenna þar á bæ.  Hannes segir að Jóhannes eigi að gera eins og Björgólfur Guðmundsson að fyrirgefa þeim sem komu illa fram við hann !  Aumingja Björn, alltaf að lenda í vandræðum. 

Hlustið       http://visir.is/article/20070520/FRETTIR01/70520012&sp=1

 

                                                     

Hvað voru Geir og Jón að gera svona lengi?

Nú hafa stjórnarflokkarnir afhent þjóðinni lykilinn að völdunum.  Allt of lengi sátu þeir Geir og Jón yfir svo sem litlu meðan þjóðin beið fyrir utan.   Þegar þeir komu út var súr svipur á Jóni.  Hvað gerðist eiginlega þarna inni? Hafnaði Geir Jóni eða Jón Geir? Nú eru Ingibjörg og Geir að tala saman og þau leyfðu Össuri og Þorgerði Katrínu að taka þátt í samtalinu. Þá man Jón allt í einu eftir því að það gæti verið heppilegt fyrir Íslendinga að fá vinstri stjórn og tekur sér umboð til að bjóða ISG forsætisráðherrastólinn.  Hvað var Jón að hugsa meðan hann var inni með Geir? Og hvað var Steingrímur Joð að andskotast á Framsókn strax eftir kosningar? Var ekki Framsókn hvort sem er brotin og búin að vera?  Solla væri fínn skipsstjóri í R lista stjórn, hún kann þetta allt mjög vel.  Sjáum til hvernig Sollu gengur með Geir. 

5953 atkvæði féllu dauð

Ég vaknaði konulaus í morgun! 

Reyndar vöknuðu allir íbúar Norðvesturkjördæmis konulausir í morgun.  Á síðasta kjörtímabili höfðum við þó eina konu á þingi, Önnu Kristínu Gunnarsdóttur sem hefur verið ötull málsvari landsbyggðarinnar. Hún var kosin burt í gær.

Ríkisstjórnin hélt velli með naumum meirihluta, munaði einum manni. 

Kjósendur sendu Framsóknarflokknum þau skilaboð sem reyndar báðir ríkisstjórnarflokkarnir hefðu átt að fá, að nú væri komið nóg.  Framsóknarflokkurinn geldur afhroð.  Sjálfstæðismenn voru klókir í kosningabaráttunni laumuðu því að kjósendum að nú væri kominn tími til að þeir tækju við heilbrigðisráðuneytinu og létu þannig Framsóknarflokkinn svara fyrir biðlistana í heilbrigðiskerfinu.  Nú er spurning hvernig ríkisstjórn verður mynduð á næstu dögum.  Varla er hægt að búast við að sama ríkisstjórn haldi áfram þó hún hafi meirihluta þingmanna því hún er löskuð og hefur minnihluta atkvæða eða aðeins 48.4 prósent á bakvið sig.  Það er því meirihluti kjósenda sem hefur kosið annars konar ríkisstjórn, það er ljóst. 

Þau 5953 atkvæði sem greidd voru Íslandshreyfingunni og féllu niður dauð tryggðu það að ríkisstjórnin hélt velli. Oh, svei ! 

 

Frábær skemmtun á Silfurtorginu

 

Samfylkingin á stóð fyrri frábærri fjölskylduskemmtun á Silfurtorgi  á Ísafirði í dag.  Við grilluðum pylsur og gáfum börnunum sápukúlur og blöðrur.  Vegfarendur fengu rauðar rósir og tónlistin ómaði um allan bæ.  Þessar hressu ísfirsku stelpur voru líka í S-inu sínu og gáfu börnum blöðrur og sápukúlur.  Húrra fyrir þeim og húrra fyrir Samfylkingunni. 

Jón Baldvin og Bryndís í plokkfiski

 

 

Á ísafirði er mikið fundað þessa dagana enda mikið í húfi að búa okkur undir betri tíð með Samfylkinguna í haga.  Í hádeginu föstudaginn 10. maí verða Jón Baldvin og Bryndís í plokkfiski hjá Samfylkingunni.  Það verður fínt að fara í hádegismat í kosningamiðstöðina og hlusta á Eðalkratann flytja hressilega barátturæðu í gamla heimabæ sínum.  Plokkfiskurinn svíkur engan því það er enginn annar en Maggi Hauks, vertinn í neðsta sem mun elda plokkfisk eins og honum einum er lagið.  Ég hef sjáldan borðað betri plokkfisk en hjá Magga, nema þá helst hjá eiginmanninum og mömmu. Ég hvet fólk til að líta við og fá sér plokkfisk og hlusta á Jón tala um íslenska velferðarkerfið og efnahagsmál. Ég vona að hann ræði einnig Evrópumálin.

 

     

Er sjálfstæðisflokkurinn að auglýsa ókeypis?

 

Þessa dagana þeytast ráðherrar um kjördæmin og útdeila styrkjum, skrifa undir samninga og klippa á borða. Fjölmiðlar mega hafa sig alla við að ná þessu á filmu því auðvitað þarf að flytja fréttir af því hvernig opinberu fé er varið.  Sjálfstæðisflokkurinn þarf því ekki að kaupa margar auglýsingar fyrir kosningarnar, því ÞETTA ERU ÓKEYPIS AUGLÝSINGAR.Á Vestfjörðum hafa svona ókeypis auglýsingar gengið látlaust allt þetta kjörtímabil.  Á Vestfjörðum hafa þingmenn og ráðherrar Sjálfstæðisflokksins fengið sauðtrygga, hreintrúaða flokksmenn með sér í auglýsingabrelluna.  Brellan gengur út á að fagna einu og einu starfi og einum og einum vegspotta, boðið er upp á snittur, flaggað og skálað og fjölmiðlar kallaðir á staðinn.  Brellan er endurtekin í hvert sinn sem moli hrekkur inn á svæðið.  Allt er gert til þess láta líta út eins og Vestfirðir séu með í hagvaxtaraukningunni. Það fer ekki eins mikið fyrir hinum sauðtryggu, hreintrúuðu þegar fregnir berast af fólksfækkun, fækkun opinberra starfa, burtseldum kvóta, fækkun starfa í sjávarútvegi og neikvæðum hagvexti þegar allt er í bullandi þenslu í hagkerfinu á Íslandi.  Hinir sauðtryggu, hreintrúuðu kalla boðbera slíkra frétta niðurrifsöfl sem kunna ekki að meta það sem vel er gert. Svo þegar fólki er nóg boðið og blásið er til baráttufundar þar sem fundarmenn lýsa ábyrgð á hendur stjórnvöldum og heimta sinn rétt eins og gert var 11. mars sl. á Ísafirði þá láta stjórnarþingmenn ekki sjá sig og hinir sauðtryggu, hreintrúuðu kalla borgarafundinn Samfylkingarfund. Ja, mikill er máttur Samfylkingarinnar í þeirra augum.  Nú er svo illa komið fyrir stjórnarliðum að þeir hafa það vondan málstað að verja að þeir verða að halda fundina á Vestfjörðum í vernduðu umhverfi þar sem tryggir varðhundar þeirra umkringja sæðið.

Frelsum þá úr þessari ánauð þann 12. maí og kjósum Samfylkinguna.   

1. maí

 

Hvað er svona merkilegt við 1. maí?

 

1. maí var alltaf mikill hátíðisdagur í allri fjölskyldunni þegar ég var að alast upp.  Dagurinn var sérstaklega tekinn frá fyrir kröfugöngu þar sem allir voru klæddir í sitt fínasta púss.  Ég man hve við systurnar vorum oft kaldar í þessari göngu í nýjum kjólum með hatta, hanska og í lakkskóm, hvernig sem viðraði.  Bræður okkar sluppu betur því vel pressaðar sparibuxurnar voru hlýrri en kjólarnir.   Síðan var farið heim til afa og ömmu í súkkulaði og kökur og við börnin fengum að ólátast meira en venjulega og vaka lengur fram eftir og andrúmsloftið var einhvern veginn léttara þennan dag.  Okkur var sagt að þetta væri kröfuganga en ekki skrúðganga og það væri mikill munur á þessm göngum. Þó okkur krökkunum hafi verið sagt frá því að þetta væri alþjóðlegur baráttudagur alls  launafólks þá var það ekki fyrr en á fullorðinsárum að sagnfræðin færði okkur vitneskjuna um ástæður þessarar miklu hátíðar á þessum degi.

 

Margar kynslóðir launþega víða um heim hafa haldið þennan dag hátíðlegan og minnast hans enn í dag vegna þess að forfeður okkar þurftu að berjast fyrir þeim  réttindum sem við njótum í dag og þykja sjálfsögð.  Þeir voru ekki einungis að berjast fyrir betri launakjörum heldur lögðu þeir með baráttu sinni  grunninn að almannatryggingakerfinu sem við búum við í dag.  Það er vegna þeirra barátt sem við búum nú í velferðarsamfélagi sem byggir á jöfnuði, réttlæti og samábyrgð.  Þeir sóttu okkar rétt  með miklum erfiðismunum og okkur ber að standa vörð um hann og skila honum áfram til komandi kynslóða. Þó kjör okkar og baráttumál í dag virðast vera allt annars eðlis en afi og amma þurftu að glíma við þá eru þau á sama grunni, af sama meiði.  Nú stöndum við vaktina við að verja þann rétt sem þau sóttu fyrir sig og afkomendur sína.  Þess vegna er mikilvægt að við berum áfram til afkomenda okkar þennan félagslega arf sem við fengum frá foreldrum okkar sem þau bera svo áfram til sinna barna.  Þess vegna er 1. maí enn í dag haldinn hátíðlegur víða um heim.   Á þessum degi erum við að minna hvert annað á að það er samstaðan sem skilar okkur fram á veginn.

Stöndum því áfram vörð um velferðarkerfið og þau grunngildi sem sátt ríkir um á Íslandi.