Hvað er málið með Jón Baldvin?

    Ég var að lesa viðtal við Jón Baldvin í Blaðinu um helgina.  Eftir lesturinn sagði ég við sjálfa mig; "hvað er málið með hann Jón Baldvin?"  Af hverju eru fjölmiðlar sífellt að flytja fréttir af því að maðurinn sé húsnæðislaus í pólitík.  Hann telur upp stefnumál Samfylkingarinnar í fyrsta, öðru og þriðja lagi og lýsir velferðarsamfélaginu eins og það mun líta út þegar Samfylkingin er komin í ríkisstjórn og búin að færa það inn í þann skandinavíska ramma sem sátt ríkir um á Íslandi.    Í lok viðtalsins lýsir hann hvernig óskaríkisstjórn hans lítur úr eftir kosningar og þar lýsir hann einmitt stefnumálum Samfylkingarinnar þegar hann segir;

“Ég vil fá ríkisstjórn sem segir þjóðinni satt um stöðu mála.  Ríkisstjórn sem leggur fyrir þjóðina skilgreind markmið um að ganga í Evrópusambandið, gefur henni réttar og haldgóðar upplýsingar um hverjir eru kostir þess og gallar og gefur henni tíma til að átta sig á því, hvað muni breytast við inngöngu.  Ég vil fá ríkisstjórn sem endurskoðar frá grunni forsendur okursamfélagsins og hið ríkisrekna landbúnaðarkerfi.  Þetta er best gert í tengslum við inngöngu í Evrópusambandið.  Ég vil ríkisstjórn sem stendur fast á grundvallarsjónarmiðum jafnaðarmanna hvað varðar velferðarríkið.  Það hefur orðið svo mikil skekkja að fólk er í sumum tilvikum orðið fórnarlömb kerfisins, sem átti að þjóna því.  Það þarf að gera grundvallarumbætur á okkar þjóðfélagi.  Þær eru svo róttækar og umfangsmiklar að það mun taka tvö kjörtímabil í framkvæmd.  Hverjum treysta kjósendur til slíkra stórræða? Þetta er að lokum spurning um traust”

Þá höfum við það, Hvað er þá málið? 

Athugasemdir

[alla (IP-tala skráð) 22.4.2007 kl. 14:45]

Þurfum við ekki bara að finna eitthvað handa honum Jóni að gera?  Jón Baldvin er og verður jafnaðarmaður og á að einhenda sér í að aðstoða okkur við að sameina þá alla í einn flokk!  Alla med!

[Arna Lára Jónsdóttir, 22.4.2007 kl. 14:55]

Gaman að þú skulir vera farin að blogga. Ég hlustaði á Jón Baldvin í Silfrinu í hádeginu þar sem hann talar sem sannur jafnaðarmaður og jafnaðarstefnuna er bara að finna í einum flokki sem ég veit um, Samfylkingunni. Það er kannski bara pínu erfitt fyrir hann að vera ekki við stjórvölinn.